सुंद’ जिउ जारिमिन
रेवरंड विल्प्रेड आरो गुविन्ट क्राफ्ट
गवलफारा बड़ो बेपतिष्ट चर्च एससिएसननि गिबिथि मिशनेरि
बेखेवनाय: (“Assam not by Chance” by Dr. JV Webster and DN Cheney)
“जोंनियाव फैनाय आरो मद'द कालामफै”
अक्ट'बर 1944 माइथायाव आस्ट्रेलियान बेपतिष्ट मिशनेरि चचाइटिया बे लिंनायखौ खोनादोंमोन
सानजा आसामाव थानानै मावनाय एमेरिकानि बेपतिष्ट मिशनेरि 1905 माइथायनिफ्राइनो बर’खौ लोगो लाफैबाय थानायमोन, नाथाय सासेबो मिशनेरि बिसोरजों थाफायाखैमोन। गोबांथार नासयजादोंमोनब्लाबो आरो न’फोर सावजादोंब्लाबो बर’फोरा बिसोरनि फोरोंनायकै लादोंमोन आरो बेबादिनो ख्रीष्टान गिरजाफोर गाइसनजायासै। बेबादिनो 1927 माइथायाव गासै गिरजाफोरा खौसे जायासै आरो थुक्राझार गामियाव गवलफारा बर’ बेपतिष्ट इउनियन गायसनासै। बै समाव एमेरिकान बेपतिष्ट मिशनेरि बर’ गिरजाफोरजों बोसोराव केबसे, फेब्रुआरि दानाव सानथामनि बोसोररारि जथुमायाव लोगो लाफैयोमोन। जोंनि बर’ रावाव बाइबेल गैयामोन बिनिकाइनो असमीया रावनि बाइबेलखौ बर’ गिरजाफोरा बाहाइयोमोन। नाथाय बै समाव जोंनि बर’फोरा खायफा गिरजायाव सासेबो असमीयाखौ फराइनो एबा बुजिनोबो हानाय गैयामोन, बिनिकायनो 1944 माइथाया फोरोंनायनि सायाव माखासे टक्थ्रिनेल गोरोनथिफोरबो नुजादोंमोन। बेपतिष्टमा होनाय आरो फोरबुनि जानाय बेबादि हुदाफोरा माखासे सम दोनथ'जानाय जादोंमोन आरो गोबां ख्रीष्टानफोरा गाव-गावनि गोजाम फोथायनायाव थांफिनदोंमोन आरो सैथान फुजिनाय, माइरंनि जौ (Rice Beer) लोंनाय आरो सासेनि बांसिन हाबा खालामनाय बेबादि हुदाफोरखौ कलामहैफिनो।
आस्ट्रेलियान बेपतिष्ट मिशनेरि चचाइटिआ 1882 माइथायनिफ्राय भारतनि मोनसे हादरसा सानजा बेंगलआव बिफा ईसोरनि हाबायाव मावबायथादोंमोन, बे समाव जोंनि बर’ मानसिफोरा, जोंनि आसाम हादरसायावबो मिशनेरिनि गोनांथि बेखौ बिसोरनिसिम मिथिहोहरासै। बेबादि हांख्राइनायखौ मोनानै सानजा बेंगलआव थानाय आस्ट्रेलियान बेपतिष्ट मिशनेरि चचाइटिया गोख्रों गोसो गुदुङै आसामाव फैनानै बर’फोरखौ लोगो हमफैयासै। खेबसे गिदिंफैनायनि उनाव रेवरंड भिक्थर बारर्नादआ ए.बि.एम.एस (ABMS) नि गाहाय नेहाथारिनिसिम लाइजामजों मिथिहोहरासै।
गाहाम रादाबखौ खोथानायनि हालाम हिसाबै हाखौ थि खालामनाय जाबाय। माखासे मोजां बेगरफोरा मोजां हायाव गोग्लैबाय आरो रजनानै रोदाबो सुबाय। बांसिन थुलुंगानायनि बाथ्राया बेनोमोनदि बे जायगानि गोबां मानसिफोरा जोंनि फोरोंनायफोरखौ मोजां मोनदों। माखासे मानसिफोरा सोलोंनानै दैदेनगिरि, पेस्टर, बोसोन होग्रा आरो फोरोंगिरि जानो थाकाय थियारि दं। “जोंनियाव फै आरो जोंखौ मद’द खालामफै” होन्नानै लिंहरनाय बे बाथ्राया आंनि गोसोआव सम-सम जाखांबाय थायोमोन आरो बेयो मोनसे गोरलै नाङामोन।
लासै-लासै फिथाय गोनां सावरायलायनायजों 1947 माइथायनि एप्रिल दान्नि 14 अक्ट’आव, एमेरिकान आरो आस्ट्रेलियान बेपतिष्ट मिशनेरिनि गेजेराव 1947 माइथायनि मे दान्नि 1 अक्ट’निफ्राय आस्ट्रेलिया बेपतिष्ट मिशनआ गासै बिबानफोरखौ लानानै ब्रह्माफुथ्रा दैसानि साहा भुटान हादरमानि रुगुंसिम बर’फोरनि गेजेराव फोरबुनि हाबाखौ मावनो थाखाय मोनसे गोरोबथायाव फैयो आरो बेबादिनो जाबोबाय थादों।
थुक्राझारआव फोरबुनि हाबा मावग्राफोर
मुंखजाथाव दि, आसाम हादरसायाव गिबिसिनथार फोरबुनि हाबा मावग्रा हिसाबै आस्ट्रेलियान बेपतिष्ट मिशनेरि चचाइटिआ रेवरंड विल्फ्रेद आरो गुविन्ट क्राफ्ट मोनखौ सायख’नानै दैथाइहरो। बे समाव सानजा बेंगलनि मावफाग्रा लोगोफोरा लिंहरदोंमोनदि, “बै मुंखजाथाव फोरबुनि सानै मावग्राफोरा मिथिसारजाखानाय आखा-फाखा, मानोना बिसोरहा थ्राइबेल मानसिफोरनि गेजेराव गोबावथार सम हाबा मावनायनि रोंगथि दंखायोमोन”।
बे रेवरंड विल्फ्रेद आरो गुविन्ट क्राफ्ट मोननि थाखाय मोनसे गोब्राब सम्मोन, मानोना बिसोरो बे समाव बाजि बोसोर (50 years) बैसोनि जाखाबायमोन आरो गावसोरनि अन्जालु-अन्जालि साथाम बिसाफोरखौ अष्ट्रेलियायाव नागारबोनायजों लोगोसे मावनाय हाबानिफ्राय जिरायथ’नानै नुजाफैदोंल’मोन आरो विल्फ्रेद आरो गुविन्ट क्राफ्ट मोनि थाकाइ थांखि लानाया गोब्राब, सानस’ हायै जादोंमोन। सान्जा बेंगलनि बिरिसिरि ओनसोलाव गोबाव बोसोर हाबा मावनानै बिसोरहा गोबां अनथाव-अनथाव गार’ मानसिफोर दंसैमोन। नाथाय बिसोरो गोथां ईसोरनि लिंनायखौ मिथिनानै गासैखौबो फोरबुनि मुङाव दोनथ’नानै बर’फोरनि थाखाय मावनो थुक्राझारआव 17 मे 1947 माइथायाव सफैयो, जाय गामियाव बिसोरहा सासेबो सिनाइनाय मानसि गैयामोन। बिसोरनि राव आरो थानाय-जानाय, गान्नाय-जोमनायफोरखौबो जेबो मिथियामोन। बे जायगायाव ईसोरनि हाबा मावग्रा बिथा न’ मावफुलि एबा गुबुन रोखोमनि जायगा गैयामोन। बिसोरनि गिबिसिनथार थाग्रा न’आनो जाबाय खथासेनि न’, हाजों लिरजानाय इनजुर, थुरि जिगाबनि उखुम आरो औवानि बानायनाय बिसिना (एम) ल’ दंमोन। लोगोसे दैनि थाखाय काथियाव दैकर गंसे आरो स्रांनि थाखाय गंसे बाथि दंमोन।
रेवरंड विल्फ्रेद आरो गुविन्ट क्राफ्ट
रेवरंड विल्फ्रेद आरो गुविन्ट क्राफ्टआ 1896 माइथायनि एफ्रिल दान्नि 11 अक्ट’आव बिफा र’मान केथ'लिक निक'लास जसप क्राफ्ट आरो गुबुनजों गोरोबै बिमा एलिस मेरि ब्रे नि जिथि (10) फिसा, लण्डण नोगोराव जोनोम मोनदोंमोन। फोरबुनि गाहाम हाबायाव सिगांनि जेबो सोमोनदो गैयामोनब्लाबो बिहा बे लामायाव उनदैनिफ्राय गोसो जानायजों लोगोसे जिसु ख्रीष्ट’निआव गावखौ गथायनान दंमोन। फराइसालियाव मोजां खालामब्लाबो बियो उन्दै बैसोआवनो नागारो आरो गावनि जायगानि रादाब बिलाइयाव रादाब बुथुमग्रा हिसाबै मावदोंमोन।
बिब’ नेल्लि नि टियुबरक्लोसिस बेरामनि थाखाय डक्थरनि बिथोनबादि बिसोरो गुदुंसिन जायगा हिसाबै लण्डननिफ्रय सोनाब अष्ट्रेलिया हादरमानि मोनसे फ्रेमेन्टेल होन्नाय थावनियाव 20 अक्ट’ फेब्रुआरि दान्नि 1911 माइथायाव न’खौ सोलायासै। एसे उनाव बियो अष्ट्रेलियानि पर्थ होन्नाय नोगोराव मोनाबिलि फराइसालियाव फराइयो आरो मोनसे आएननि मावख'लियाव हेफाजाब होग्रा हिसाबै मावो। पर्थ नोगोराव फैजेन्नायनिफ्रायनो बियो सम-सम पर्थ नोगोरनि बेपतिष्ट गिरजायाव लोगो लानानै आरो लासै-लासै रेवरंड एफ. इ. हेरीनि फोरोंनायजों ख्रीष्टान फोरोंनाया रोदा सुनो हमासै।
जेब्ला सेथि भुम नाङै दावहा जायो अब्ला 1914 माइथायनि अ'गास्ट दान्नि 4 अक्ट’आव विल्फ्रेदआ माकासे गिरजानि लोगोफोरजों सेनायाव थिसनजायासै आरो गुबुन हादोराव ओंखारलाङासै। नाथाय 1918 माइथायनि अ'गास्ट दान्नाव बियो आइथेङाव जखम जायासै आरो दसे सम इंगलेन्डनि फाहामसालियाव थानानै गंनै लावथि थुनानै न’ फारसे फैफिन्नो। बियो आएन्नि मावख'लियाव हाबफिन्नानै जि (10) थाखोनि आक्जुथाय आनजादखौ उथ्रिनानै सोनाब अष्ट्रेलियानि इउनिभारचिटियाव मोनाबिलि फराइसालियाव फराइफिनासै। फोरबुनि हाबानि थाखाय बियो मेलबोर्ननि बेपतिष्ट थीअलोजि फरायसालिमायाव फराइयो आरो लोगोसे बि. ए. खौबो सोनाब अष्ट्रेलियानि इउनिभारचिटिनिफ्राय फोजोबो। 1921 माइथायनि मार्च्च दानाव बियो मिशनेरि हिसाबै मावनो थाखाय अष्ट्रेलियानि फ'रिन मिशन ब'र्ड बेपतिष्टआव मोनसे आर’ज बिलाय होयो आरो 1923 माइथायाव इउन बाहागोआव इष्ट बेंगलआव ओंखारबोयो, जाया बै समाव आस्ट्रेलियान बेपतिष्टफोरनि मोनसेल’ मिशन हालाम दंमोन।
गुविन्ट क्राफ्ट
गुविन्ट इजबेल हैरीआ हेलेन आरो फ्रेडरिक एडवर्ड हैरी नि सेथि गथ’मोन आरो अष्ट्रेलियानि सिडनी नोगोराव 1897 माइथायनि जुन दान्नि 30 अक्ट’आव जोनोम मोनदोंमोन। बिहा साब्रै बिनानावफोर आरो सासे फंबाइ दंमोन। बिसोरना नख'ररा सिडनी नोगोरनिफ्राय वेस्टार्न अष्ट्रेलियानि फर्त नोगोराव दोरोदासै आरो एप. इ. हैरीआ सिटि बेपतिष्ट चार्चआव पेस्टर हिसाबै मावनो आरो गासै नख'रानो गिरजायाव लोब्बा जायासै। लासै-लासै गुविन्थ इजबेल हैरीआ मोनसे गोख्रों मावफाग्रा जायासै, जेरै गिरजानि मेथाय कन्नायफोर, चान्दे स्कुलआव भागो एबा दैदेन्नाय आरो उन्नदैफोरखौ मेथायाव दैदेन्नाय। बिहा गोबां बोरफोर दंमोन आरो सासे मेलेमजिबिमोन। बियो सासे गोजों सोलोंसामोन आरो गिबिथि थाखोनि मान मोन्नानै 1918 माइथायाव अष्ट्रेलियानि वेस्टार्न इउनिभारचिटिनिफ्राय देरहासात जायो। एलाएस फ्रैंकोइस गोल्ड मेडल बानथाया बिनि रावखान्थिनि सायाव नुसारजानाय गुनखौ गिबिसिन बेक्थि। बियो दसे सम फोरोंगिरि जादोंमोन नाथाय 1918 माइथायनि उनाव अष्ट्रेलियानि फ'रिन मिशन ब'र्ड बेपतिष्टनिसिम आर’ज बिलाय गथायो। मिशनेरि हिसाबै मावनो थाखाइ बिनो बे बिथिङाव फराइनो गोनांथि जायाखोसै मानोना बिनि नखरारि हाबा आरो गिरजायाव मावनाय हाबाफारिखौ थोजासे हमनानै लायासै। 1920 माइथायनि नवेम्बार दान्नि 23 अक्ट’आव बियो गावनि नखर आरो गासै लोगोफोरजों बिदाय लानानै इष्ट बेंगलनि मेमेन्सिंघ नोगोराव ओंखारासै। जाय दिङायाव बियो गाखोदोंमोन बे दिङायाव सासे गिदिर मिशनेरि विलियाम केरी आरो बिनि बिसौनि बिसाज्लाबो गावनि हिन्जावजों लोगोसे दंफैयोमोन।
विल्फ्रेद आरो गुविन्टमोना गोबां जायगाफोराव गिदिंनानै गोसोनि बोलोजों फराइसालि आरो गिरजाफोरखौ फोसाबदों आरो मद’द गैयै रेत्सा-फेत्सा जानान थानाय बेपतिष्टफोरखौ कौसे कालामफिनदों। उन्दुनान थानाय ख्रीष्टानफोरखौ फोजाखांफिनदोंमोन, फोथाइसुलाफोरखौ फुदुंकांदोंमोन, सोलोंथाइखौ फोसाबदोंमोन आरो समाजफोरखौ साजाइदोंमोन। बिसोरो थुक्राझारआव थानाय सामाव गुबुन-गुबुन गामिफोराव आरो ओनसोलफोराव गिदिंबाइयोमोन, बेबादिनो सानसेखालि बागफारानि सासे गार’ जोहोलावखौ लोगो मोनो आरो बिजों मोजां सिनायथि लायो नाथाय बे सिनायथियानो मोनसे समाव बागफारा ओनसोलाव गार’ मानसिफोरनो आस्ट्रेलिया बेपतिष्ट मिशनेरि चचाइटिआ फोरबुनि हाबा मावनो खाबु होआसै।
विल्फ्रेद आरो गुविन्टमोना 1951 माइथायनि मे दान्नाव थुक्राझार मिशन स्टेशननिफ्राइ बागफारा गामियाव थाङासै। इष्ट बेंगलनि बिरिसिरि ओनसोल्लाव गार’फोरजों गोबाव बोसोर मावबोखानाय बिसोरहा बिसोरजों खामानियाव गोब्राब जायाखै। नाथाय जेब्ला इष्ट बेंगलखौ, इष्ट पाकिस्तान खालामनाय जायो, अब्ला माखासे बिरिसिरिनि गार’फोरखौ बागफारा ओनसोलाव लाबोदोंमोन, अब्ला विल्फ्रेद आरो गुविन्टमोना गावनि गारबोनाय गोजाम लोगोफोरखौ लोगोमोनफिन्नो आरो रंजानायनि फरिबेश्खौ मोनफिनासै। दसे उनाव बिसोरो मोनसे गोगोम गार’ गिरजा गाइसन्नासै।
1951 माइथायानि उन बाहागोआव गुविन्ट आरो 1952 माइथाय गेजेर बाहागोआव गोबों अन्नाय आरो बाख्नायनायजों अष्ट्रेलियायाव बिदाय हरफिनजादोंमोन। बिसोरनि उनाव फैनाय थुक्राझारनि मिशनेरि रेवरंड पीटर इविंगआ बिसोरनि मेंनो रोङै मावनायखौ दामगोसा महरै मान बावनायजों बिदाय होयो।
“मोनसेनि बांसिन जायगाफोराव मावोब्ला ओरैनो मानसिफोरनि गोसोआव आंगोनि अन्नाय आरो मान होनायखौ जों नुनो मोनो नाथाय रेवरंड विल्फ्रेद आरो गुविन्ट क्राफ्ट मोना हले गार’ आरो बर’ हालामाव मोनसे समावनो मावब्लाबो बे आंगोनि अन्नाय आरो मानखौ मानसिफोरनिफ्राय मोनो हादोंमोन। बिनि मावनायफोरनि गेजेराव बर’ आरो गार’फोरनि फोथायनाया गोगोम जादों आरो इसोरनि राइजोनि सोमोन्दै बुजिनायाव आखा-फाखा जादों, बेल’ नङा नाथाइ गावबागावनि आथिङाव माबोरै गसंनानै बिफानि राइजोनि थाखाय माबोरै मावलांनांगौ बेखौबो स्रायै दिन्थिलाङासै। गावसोरनि हारसिं ख्रीष्टान फालो होनानै सानबावलिया नाथाय बिसोरो मोनसे गिरजा जाबाय, मोनसे मोदोमजों दाजानाय गोथां देहाबादि आरो गावनि मानसिफोरनि आरो गुबुनफोरनि सायाव आखाइखौ गोलाव फोलावनो हाबाय। गोबां समाव गावखौनो गुबुन्नि थाखाइ ग'थायसोनानै मावनो गोब्राब जायो जेब्लासिम मोनसे हारिया एबा दाफाया गावनि नांगौखौ गावनो बुजिनो हाया आरो गावनि नांगौनि थाकाय गावनो मावनो आवगाइबोआ। नाथाय गंसे उदां आरो ख्रीष्ट'नि देरहासात गिरजा लुखांनोब्ला नंगौ नांथाबनाय दैदेनगिरिनि गोनांथि जायो।”
विल्फ्रेद आरो गुविन्ट क्राफ्टमोना मिशनेरि कामानि मावखांनायनि उनाव पर्थ नोगोराव गोबाव रंजा कुसियै गोबाव बोसोर नख’र हिसाबै खामियो। अष्ट्रेलियायाव थांफिन्नायनि उनावबो बिसोरो अष्ट्रेलियानि बेपतिष्ट गिरजाफोराव मेङाजासे गोख्रों गोसोजों गिदिंबायदोंमोन आरो इन्डियायाव गोसो होसारनानै मावनायफोरखौ रानज्लायदोंमोन। क्राफ्टआ गावनि फोरबुजों लोगोसे थानो 1960 मइथाययाव लिंहरजायासै आरो रेवरंड विल्फ्रेदआ गावनि फोरबु आरो बिग्बाजों 1971 माइथायनि मे दान्नाव गवजों लिंहरजायासै।
(गेजौआव गासै लिरनाय राइथाइफोरा रेवरंड विल्फ्रेद आरो गुविन्ट क्राफ्टनि फिसाजो जाय डिभेरियुक्च “Baptist Historical Society of Western Australia” नो गथायनाय बिलाइनिफ्राय आरो Dr. J.V. Webster and D.N. Cheney सिगांनि थुक्राझार आरो बागफारानि मिशनेरि लिरनाय बिजाब “Assam not by Chance” निफ्राय सेफखांनाय जादों।)
Dr. Pradip Narzari (MBBS, FCAMS)
थुक्राझार
