रांखानथि
रांखानथि आफादआ मोनसे बि बि सि ए नि गोनांथार दालायसा आफाद, रांखानथि नेहाथारिनि गोक्रों नोजोरनि सिङाव रां हिसाब लाकिग्रा आरो फाइनेन्स ब’र्डजों गोरोबज्लायनानै मावगासेनो दं। एससिएसनआ रांखानथि नेहाथारिनि गोनांथिखौ गोबाव समनिफ्रायनो मोनदोंमोन आरो फरिन एकाउन्टनि बिथिङाव गोबाव समनिफ्रायनो एससिएसननि जाइन्ट थ्रेजारारआ जोथोन लादोंमोन, नाथाय, थांनाय 2016 माइथायाव बे कामानिखौ मावफुंनाय जाबाय।
एससिएसनआ ख्रीष्टान जोथोनगिरिनि सोमोनदै फोरोंबोयो आरो रांखानथि आफादआ एससिएसन आरो ईसोरनि धोन्फोरखौ जोथोन लानायखौ मावनो गोबां बिबान सान्नान लायो आरो मन्द’लि, सिबियारिफोरनि दान होसोग्रा बेक्थिफोरनो बेफोरबादि धोन-समफ’थिखौ गोगोम फोथायनाय आरो कौसेथियै रोखा-रोखायै बोसोराव केबनै जेनेरेल कावन्शिल जथुम्मायाव हिसाब होयो। बेफोरबादि गासै हाबाफारिनि गेजेराव, रांखानथि आफादआ बोसोररारि आइ हिसाब कालामनानै एससिएसननि बोसोररारि नोजोर आरो थांखिनि गेजेरजों मावने हाबाफारिखौ रां हिसाब दिन्थियो आरो नुस’ हायै रां गोनांथिखौ जाथायनि थाकाय दोन्थयो। बे बोसोररारि आइखौ जेब्लायबो नोजोर होबाय थायो आरो फोसाबाय थायो आरो सुबिदाबादियै मावबाय थायो।
मुंख’जाथावदि एससिएसनआ गोनांथिफोराव गासै सोद्रोमा मन्दलि आरो सिबियारिफोरनि गोसो गुदुङै होनाय दान आरो आलादायै गोसो गुदुं फोथायग्राफोरनि ओरैनो होनाय दानफोरजों गासैबो हाबाफ्रा मावजानाय जायो। मानसिनि नुनायाव बेफोर धोनफ्रा उन्दै नाथाय एससिएसनआ आस्ट्रेलियान मिशनेरिफोर थांनायनि उनावबो नांगौबादियै गावनि धोनफोरजोंनो हाबाफारिफोरखौ मावगासेनो दं।
