बारग' गाहाय नेहाथारिनि मासिनिफ्रइ सुंद' रादाब
जोंनि फोरबु जिसुनि मुङाव बर’ बेपतिष्ट चार्च एससिएसननि जानानै गाहाम हामलायनायखौ बयनोबो जासिनाय जाबाय। ईसोरनि मानसिफोरनि गासै भुमाव फोरबु जिसुनि गाहाम रादाबखौ फोसावनायनि थिरांथानि गेजेरजों बे आफादआ दिनै गावनि मोनसे उदां वेब-चाइट हगारनाय जाबाय। दिनै बर’ बेपतिष्ट (थुक्राझार) आ गोजोनलायनो हाबायदि, मानोना जाय वेब-चाइटखौ गोबाव समनिफ्राय नेबाय थादोंमोन बेखौ मोख्थाङाव नुनो मोनबाय आरो बेनि गेजेरजों बिफा ईसोरनि महिमाखौ बांसिन सुबुं माहारिनो गोसारहोनो खाबु मोनबाय।
लोगोफोर, नोंथांमोन्ना कोनाबाय जे माबोरै बि.बि.सि.ए आ गाइसनजायामोन, बहानिफ्राइ फैयामोन आरो दासिमाव माबादि नाजानायजों मावबोखो। सिगांथिं नायहरनानै, जों बि.बि.सि.ए आ बिफा ईसोरनि राइजोनि थाखाय जिसु ख्रिष्ट'नि गाहाम रादाबखौ फोसावनायनि हाबायाव नांथाबगासिनो दं। बि.बि.सि.ए आ मावनायनि आदब खायदाफोरखौ मोनकाबाय, जायनि गेजेरजों सोलायहोनायनि साबसिन्नै मावनायफोरखौ गासै सा-सानजा भारतआव जों दा नुनो मोनो। बि.बि.सि.ए आ गोबाव समनिफ्रयनो ईसोरनि मावख्रुबग्राफोरखौ गुबुन-गुबुन माहारि आरो जायगाफोरनि गेजेराव लोगोसे खाथियाव थानाय गावनि हादोरावबो (भुटान ओरो नेपाल) दैथायहरनानै मावगासिनो दं। बे हाबाफोरखौ मावनायाव गोबां सोद्रोमा गिरजाफोर आरो गोसो गुदुं सुबुंफोरा फोरबु जिसुनि गाहाम रादाब फोसावनायाव आवगायबोदों। लोगोसे मुंख’जाथावदि, मेघालयनि टुरा बेपतिष्ट चार्चआ बि.बि.सि.ए जों लोगो लानानै थांनाय जिबा (15) बोसोरनिफ्राय भुटानआव बिफा ईसोरनि मावग्राफोरखौ दैथायहरनायजों मावगासिनो दं। बोबादि गोब्राब जालायनानै मावनाय गाहाम रादाब फोसावनाय आदब खाइदाफोरा मोजां सोलायबाय थानाय समजों गोरोबनाय हाबाफोरखौ मावफुंनो हायो। आरो बेबादि गोब्राब जालायनानै मावनाय हाबाया माखासे गोनांथार गार’-बर’ ख्रीष्टान सोमोनदो लानायखौ समायहोयो आरो बेजोंनो बिफा ईसोरनि महिमाया नुजाफ्लायो।
बेबादि गोजौ एबा गाहामथार हाबा मावनायजों बिफा ईसोरनि रइजो फेहेरनो जिसु ख्रिष्ट’नि गाहाम खौरां खिनथानायाव, गासै भुमनि फोथायसुला-फोथायसुलि सुबुंफोरखौ बि, बि, सि, ए आ बांसिनै मावजानाय जागोन होन्नानै हामलाइनायजों बइखौबो गोथार गोसोजों हांख्रइनाय बावहरबाय। आरो जों सानो बेनि गेजेरजोंनो बे जायगानि गासैबो आद्रा थानाय हाबाफ्रा मावफुंजागोन। जोबनायाव नोंथांमोन्नि आर’जनि गेजेरजों गोरोबनानै बिफा ईसोरनि हाबाखौ मावनाया गोजौ जौगालांगोन आरो आं बारग' गाहाइ नेहाथारि जानानै हामलाइयोदि, फैगौ समफ्रव गोजोनसिन जागोन होनानै फोरबुनियाव हास्थायो।
नाजानायखौ आराइ सम दोनबाय।
फोरबुनियाव नोंथांमोनियाव
